Bêjara Neteweparêz Di Kovara Hawarê De, wekî tezeke masterê hatiye amadekirin û derpêşkirin.  Helbet, çendî ku wekî xebat û berhemeke kesîdeyî afirîbe jî, ji gelek alîyan ve hewceyî xwendina giştî ye. Loma jî nirxandin û dahûrandinên di vê pirtûkê de hatî kirin, di biwara bêjarê (discoursê) de, bibe rêyeke ji gelek rêyan a dahûrandina di vî warî de ku her hewl hatiye dayîn ku sedem û bingehên hebûna Kurdan were pêdandin û peyitandin.

Di vê xebatê de, pêşî ji bo danîna bingeha tezê, hewl hatiye dayîn ku; bi kurtasî têkilîya têgihên modernî, netewe û neteweparêzîyê bê dîyarkirin. Di ser vê bingehê re, pêşî lêkolîn li ser sedema afirîna neteweyan hatiye kirin da ku sedem û qonaxên netewebûnê ku di ser gelên etnîkî re û di ser afirandina neteweyan re pêk tê, bê aşkerakirin.

Her wiha, ji bo çêtir têgihaştina mijarê, wekî gelekî etnîk, lêkolîn li ser neteweya Kurd hatiye kirin û wekî destpêk ramana neteweparêzîya Kurd hatiye gengeşekirin. Û digel van yekan jî, bal li ser jêderkên etnîkî û ramana neteweparêzîya Kurd hatiye kişandin.